گھر میں اسلحہ رکھنے کی بہت بڑی قیمت چکائی، سنجےدت

ممبئی: بالی ووڈ اسٹار سنجے دت کا کہنا ہے کہ انہوں نے گھر میں اسلحہ رکھنے کی بہت بڑی قیمت چکائی اور اس ایک عمل نے ان کی زندگی برباد کردی۔

سنجے دت کانام 1993 میں ہونے والے ممبئی حملوں میں سامنے آیا تھا اور اس  دوران ان کے گھر سے اے کے 56 رائفل برآمد ہوئی تھی۔ جس کے بعد انہیں دہشتگردی اور تباہ کن سرگرمیوں میں ملوث ہونے کے باعث مجرم قراردیاگیا تھا اور اسی کیس میں انہیں 5 سال قید کی سزا سنائی گئی تھی۔

اداکار سنجے دت نے حال ہی میں ایک انٹرویو کے دوران خود پرلگنے والے دہشتگردی کے الزامات اور جیل جانے کے واقعات پر بات کی۔ سنجے دت نےکہا کہ انہوں نے گھرمیں بندوق رکھنے کی بہت بڑی قیمت چکائی ہے اور اس واقعے نےان کی زندگی تباہ کردی۔

اس خبرکوبھی پڑھیں: ’سنجو‘ چھٹی کامیاب ترین فلم

سنجے دت نے کہا کہ ان کی زندگی پر فلم بنانے کا خیال سب سے پہلے ان کی بیوی مانیتا دت کے ذہن میں آیاتھا جس کے بعد انہوں نے ہدایت کار راجکمار ہیرانی سے اس بارے میں بات کی، اس وقت سنجے دت جیل میں تھے، سنجے دت نے فلمسازوں کو اپنی زندگی، اپنی پہلی بیویوں ریحا اوریچا اور اپنی زندگی میں آنے والی دیگر خواتین سے متعلق تمام باتیں بتائیں۔

تاہم فلمسازوں نے فیصلہ کیاکہ وہ فلم میں ان کی زندگی کے کون سے پہلوؤں کو دکھائیں گے۔ فلمسازوں نے فلم کے لیے ان کی زندگی کے اہم ترین واقعات کا انتخاب کیا، جب کہ دیگر واقعات فلم کی طوالت کے باعث نہیں دکھائے گئے۔

واضح رہے کہ راجکمار ہیرانی سنجے دت کے قریبی دوست مانے جاتے ہیں وہ فلم’’سنجو‘‘کے ذریعے سنجے دت کے ان پہلوؤں کو سامنے لائے ہیں جن سے لوگ واقف نہیں تھے تاہم بہت سے لوگوں کا خیال ہے کہ اس فلم کے ذریعے راجکمار ہیرانی نے سنجے دت کی خراب امیج کو ٹھیک کرنے کی کوشش کی ہے۔

The post گھر میں اسلحہ رکھنے کی بہت بڑی قیمت چکائی، سنجےدت appeared first on ایکسپریس اردو.

فلم ’’طیفا ان ٹربل‘‘ نے ریلیز کے پہلے ہی روز ریکارڈ قائم کردیا

کراچی: علی  ظفر اور مایا علی کی فلم ’’طیفا ان ٹربل‘‘نے ریلیز کے پہلے روز کمائی کے نئے ریکارڈ قائم کرتے ہوئے ماہرہ خان کی ’’سات دن محبت ان‘‘ کو پیچھے چھوڑدیا۔

نامورگلوکارواداکار علی ظفرکی پہلی پاکستانی فلم ’’طیفا ان ٹربل‘‘20 جولائی کو پاکستان سمیت 24 ممالک میں نمائش کے لیے پیش کی گئی۔ علی ظفر کے ساتھ یہ مایاعلی کی بھی ڈیبیو فلم ہے، فلم میں مایا علی ہمیشہ کی طرح خوبصورت نظرآئیں۔

اس خبرکوبھی پڑھیں: مجھے خدا اور اس کے انصاف پر مکمل یقین ہے

ریلیز سے قبل فلم کی بھرپورانداز میں تشہیر کی گئی تھی جس کے باعث امید تھی کہ فلم اچھا بزنس کرنے میں کامیاب ہوجائے گی لیکن توقع کے برعکس فلم نے ریلیز کے پہلے روز 2کروڑ 25 لاکھ کاشاندار بزنس کرکے نیا ریکارڈ قائم کردیا۔

یہ عید الضحیٰ پر ریلیز ہونے والی ماہرہ خان کی فلم’’سات دن محبت ان‘‘اورمعمر رانا کی’’آزادی‘‘کے پہلے دن سے بھی زیادہ بزنس ہے۔ ان دونوں فلموں نے پہلے روز ایک کروڑ 5 لاکھ کمائے تھے۔ اس طرح ’’طیفا ان ٹربل‘‘ نے عید پر ریلیز ہونے والی تمام فلموں کو پیچھے چھوڑدیا۔

اس خبرکوبھی پڑھیں: عید پرریلیزہونے والی فلموں کا بزنس

’’طیفا ان ٹربل‘‘پاکستان کے شہر لاہور کے ایک لڑکے طیفے کے گرد گھومتی ہے جسے پولینڈ میں رہنےوالی لڑکی مایا علی کو اغوا کرنے کا ذمہ سونپا جاتاہے، فلم میں طیفے کا کردارعلی ظفر نے اداکیا ہے۔ فلم کی موسیقی پہلے ہی مقبول ہوچکی ہے، جب کہ فلم اپنے معیار کے اعتبار سے کسی بھی بین الاقوامی فلم سے کم نہیں تھی۔

اس خبرکوبھی پڑھیں: کترینہ کیف اور مایا علی میں سے کون بہترین اداکارہ؟

علی ظفر نے ٹوئٹر پر اپنے چاہنے والوں کا شکریہ اداکرتے ہوئے کہا کہ ’’آج طیفا ان ٹربل‘‘ نے پاکستان میں ریلیز ہونے والی پچھلی تمام فلموں کا ریکارڈ توڑتے ہوئے 2 کروڑ25 لاکھ کا بزنس کرکے تاریخ رقم کی ہے۔ اس سے قبل کسی بھی پاکستانی فلم نے ریلیز کے پہلے روز اتنا زیادہ بزنس نہیں کیا، جب کہ یہ فلم عید پر بھی ریلیز نہیں ہوئی۔‘‘ ٹوئٹ کے آخر میں علی ظفر نے خدا کا شکر اداکرتے ہوئے کہا ’’بے شک، وہ برحق ہے۔‘‘

واضح رہے کہ احسن رحیم کی ہدایت کاری میں بننے والی فلم’’طیفا ان ٹربل‘‘میں علی ظفر اور مایا علی کے علاوہ جاوید شیخ، فیصل قریشی، محمود اسلم اورنیر اعجاز نے اداکاری کے جوہر دکھائے ہیں۔

The post فلم ’’طیفا ان ٹربل‘‘ نے ریلیز کے پہلے ہی روز ریکارڈ قائم کردیا appeared first on ایکسپریس اردو.

دیشا پٹانی فلم ’بھارت‘ کی شوٹنگ کے دوران زخمی

 ممبئی: معروف اداکارہ دیشا پٹانی فلم ’بھارت‘ کی شوٹنگ سے قبل ہی تربیت کے دوران زخمی ہو کر اسپتال پہنچ گئیں۔

فلم ’باغی‘ ٹو سے شہرت کی بلندیوں پر پہنچنے والی اداکارہ دیشا پٹانی سے متعلق کہا جاتا ہے کہ وہ خود کو کردار میں ڈھالنے کے لئے شوٹنگ سے قبل ہی تربیت لینا شروع کر دیتی ہیں تاکہ کردار کو بخوبی نبھایا جا سکے جب کہ اداکارہ آج کل اپنی نئی فلم ’بھارت‘ کی تیاریوں میں مصروف ہیں اور اسی سلسلے میں انہوں نے شوٹنگ سے قبل ٹریننگ شروع کردی ہے تاہم اس دوران خود کو زخمی کر بیٹھیں۔

بھارتی میڈیا رپورٹس کے مطابق اداکارہ دیشا پٹانی کے قریبی ذرائع کا کہنا ہے کہ دیشا فلم ’بھارت‘ کو لیکر خاصی سنجیدہ ہیں جس کے لئے وہ دن رات بھرپور تربیت حاصل کررہی ہیں اور اسی تربیت کے دوران وہ گٹھنے میں چوٹ لگنے کی وجہ سے بُری طرح زخمی ہو چکی ہیں۔

ذرائع نے مزید بتایا کہ اداکارہ کو ڈاکٹروں کی جانب سے سخت جسمانی مشق سے اجتناب کا مشورہ دیا گیا ہے تاکہ زخم جلد ٹھیک ہوسکیں اور دیشا ایک ہفتے بعد شروع ہونے والی فلم کی شوٹنگ میں سلمان خان کے ساتھ بہتر طریقے سے کام کرسکیں۔

یہ خبر بھی پرھیں: پریانکا کی ’بھارت‘ میں انٹری پرسلمان خان کا طنز

واضح رہے کہ علی عباس ظفر کی ہدایتکاری میں بننے والی فلم ’بھارت‘ سلمان خان کے ہمراہ پریانکا چوپڑا مرکزی کردار میں نظر آئیں گے جب کہ سب سے بڑے بجٹ سے تیار ہونے والی فلم 2018 میں عید کے موقع پر سینما گھروں کی زینت بنے گی۔

The post دیشا پٹانی فلم ’بھارت‘ کی شوٹنگ کے دوران زخمی appeared first on ایکسپریس اردو.

وہ بالی ووڈ اسٹارز جن کی مائیں ان کی ڈیبیوفلم نہ دیکھ سکیں

 ممبئی: بالی ووڈ کے ہر فنکار کی خواہش ہوتی ہے کہ وہ اپنے بچوں کی ڈیبیو فلم دیکھ سکیں لیکن چند فنکاروں کی مائیں ان کی ڈیبیو فلم سے پہلے ہی دنیا فانی سے رخصت ہوگئیں۔ 

بھارتی فلم نگری میں ڈیبیو کرنا ہر اداکار کا خواب ہوتا ہے اور اس کے لیے وہ انتھک محنت کرتے ہیں لیکن انڈسٹری میں موجود فنکاروں کے لیے فلم نگری میں اپنے بچوں کو متعارف کروانا زیادہ مشکل نہیں ہوتا البتہ اس موقع پر ان نئے فنکاروں کو اپنے والدین کی حمایت کی اشد ضرورت ہوتی ہے اور خود وہ بھی اپنے بچوں کی ڈیبیو فلم کا بے صبری سے انتظار کرتے ہیں لیکن کچھ بدقسمت اداکار اور اداکارئیں ایسی بھی گزریں ہیں جن کی ڈیبیو فلم سے پہلے ہی ان کی مائیں انتقال کرگئیں۔

جھانوی کپور

اپنی پہلی ہی فلم ’دھڑک‘ سے فلم انڈسٹری کو متاثر کرنے والی اداکارہ جھانوی کپور نے جب فلم سائن کی تو ان کی ماں آنجہانی ادکارہ سری دیوی زندہ تھیں اور انہوں نے شوٹنگ میں اپنی بیٹی کی رہنمائی بھی کی لیکن بدقسمتی سے وہ اپنی بیٹی کی پہلی فلم نہ دیکھ سکیں اور دبئی کے ایک ہوٹل کے باتھ ٹب میں گرکر انتقال کرگئیں۔

سنجے دت

انڈسٹری میں سنجو بابا کے نام سے پہچانے جانے والے سنجے دت نے اپنے فلم کیریئر میں متعدد کامیاب فلمیں کیں تاہم سنجو کا شمار بھی ان اداکاروں میں ہوتا ہے جو تمام تر خواہش کے باوجود ڈیبیو فلم اپنی ماں کو نہ دکھاسکے اور اس سے پہلے ہی وہ دنیا سے رخصت ہوگئیں، سنجے دت کی یہ کہانی حال ہی میں ریلیز ہونے والی ان کی فلم ’سنجو‘ میں بھی شامل کی گئی ہے۔

ارجن کپور

فلم نگری میں بطور اسسٹنٹ پروڈیوسر سے قدم رکھنے والے ارجن کپور معروف فلمساز و ہدایتکار بونی کپور کی پہلی اہلیہ کے بیٹے ہیں جو اب تک فلم ’عشق زادے، ہاف گرل فرینڈ، غنڈے اور ٹواسٹیٹ سمیت کئی فلموں میں اداکاری کے جوہر دکھا چکے ہیں لیکن اُن کی کامیابی کے سفر کی ابتدائی ڈیبیو فلم ’عشق زادے‘ سے ڈیڑھ ماہ قبل ہی اُن کی والدہ مونا شاؤری کپور کینسر کی وجہ سے انتقال کر گئی تھیں۔

شاہ رخ خان

بالی ووڈ میں شہنشاہ رومانس کہلانے والے شاہ رخ خان نے ایک عرصے تک بالی ووڈ پر راج کیا اور اب تک کرتے آرہے ہیں لیکن ان دنوں ان کی فلموں کو وہ کامیابی نہیں مل پارہی، اس کے باوجود انہیں بالی ووڈ کنگ سمجھا جاتا ہے لیکن انڈسٹری میں داخلے سے قبل شاہ رخ خان کے والدین انتقال کرگئے تھے لیکن وہ ہمیشہ کہتے ہیں اُن کی والدہ لطیف فاطمہ خان انہیں سپر اسٹار دیکھنا چاہتی تھیں۔

شوشانتھ  سنگھ راجپوت

بھارتی کرکٹ ٹیم کے سابق کپتان ’ایم ایس دھونی‘ کی زندگی پر بننے والی فلم سے شہرت کی بلندیوں کو چھونے والے اداکار سوشانت سنگھ راجپوت ’شدھ دیسی رومنس‘، ’پی کے‘ جیسی فلموں میں اداکاری کا جادو جگاچکے ہیں لیکن اُن کے مداح شاید ہی یہ بات جانتے ہوں کہ وہ فلم انڈسٹری میں ڈیبیو کرنے سے قبل چھوٹی اسکرین پر کام کرتے تھے جنہوں نے 16 سال کی عمر میں والدہ کے انتقال کے صدمے کے بعد بھی کامیابی کا سفر جاری رکھا۔

The post وہ بالی ووڈ اسٹارز جن کی مائیں ان کی ڈیبیوفلم نہ دیکھ سکیں appeared first on ایکسپریس اردو.

غربت کی وجہ سے تعلیم حاصل نہ کرنے پر افسوس ہے، ارشد خان

کراچی: چائے والے کے نام سے مشہور ماڈل ارشد خان نےتعلیم مکمل نہ ہونے پر اظہار افسوس کیا ہے۔

گزشتہ برس اپنی نیلی آنکھوں کے باعث سوشل میڈیا پر طوفان مچانے والے ارشد خان عرف چائے والے کی حال ہی میں ایک ویڈیو سامنے آئی ہے جس میں انہوں نے تعلیم حاصل نہ کرنے پر افسوس کا اظہار کیا ہے اور تمام لوگوں سے درخواست کی ہے کہ تعلیم ضرور حاصل کریں۔

اس خبرکوبھی پڑھیں: ارشد خان پرکشش ترین مردوں میں شامل

ویڈیو پیغام میں ارشد نے کہا آپ لوگ جس شعبے میں جانا چاہتے ہیں وہاں ضرور جائیں لیکن سب سے پہلے اپنی پڑھائی ضرور مکمل کریں۔ ارشد خان نے افسوس کا اظہار کرتے ہوئے کہا کہ آج مجھے بہت افسوس ہورہا ہے کہ میں نے غربت کی وجہ سےیا بچپن میں  غفلت اور شیطانی کی وجہ سے اپنی پڑھائی مکمل نہیں کی، جب کہ ہر شعبے میں تعلیم بہت ضروری ہے، لہٰذا آپ سب تعلیم ضرور حاصل کریں۔

واضح رہے کہ نیلی آنکھوں والے ارشد خان کافی عرصے سے سوشل میڈیا سے دور ہیں لیکن ماڈلنگ کے شعبے میں خوب نام کمارہے ہیں۔

The post غربت کی وجہ سے تعلیم حاصل نہ کرنے پر افسوس ہے، ارشد خان appeared first on ایکسپریس اردو.

جھانوی کپور کی فلم’’دھڑک‘‘مداحوں کو بھاگئی

ممبئی: بالی ووڈ اداکارہ جھانوی کپور کی فلم’’دھڑک‘‘ریلیز کے پہلے روز 8 کروڑ سے زائد کمائی کرکے پرستاروں کو متاثر کرنے میں کامیاب رہی ہے۔

آنجہانی اداکارہ سری دیوی کی بیٹی جھانوی کپور اور شاہد کپور کے چھوٹے بھائی ایشان کھتر کی فلم ’’دھڑک‘‘گزشتہ روز ریلیز کردی گئی۔ فلم کی کہانی امیر لڑکی اور غریب لڑکے درمیان محبت اورپھر اس محبت کے درمیان آنے والی مشکلات کے گرد گھومتی ہے۔ یہ مراٹھی فلم ’’سیرت‘‘کا آفیشل ری میک ہے جب کہ اسے بالی ووڈ کے نامور ہدایت کاروپروڈیوسر کرن جوہر نے پروڈیوس کیاہے۔

اس خبرکوبھی پڑھیں: ماں کی موت کے چند روز بعد جشن

فلمی تجزیہ نگار ترن آدرش نے فلم کے پہلے دن کا بزنس ٹوئٹ کرتے ہوئے کہا ہے کہ فلم نے ریلیز کے پہلے روز 8 کروڑ 71 لاکھ کماکر عالیہ بھٹ کی پہلی فلم’’اسٹوڈنٹ آف دی ایئر‘‘کو پیچھے چھوڑ دیاہے۔

سری دیوی کی موت کے بعد ان کے چاہنے والوں کو ان کی بیٹی کی فلم کاشدت سے انتظارتھا جب کہ کچھ لوگوں کا خیال تھا کہ جھانوی کپور فلم انڈسٹری میں اپنی ماں کا خلا پُر کرنے میں شا ید ہی کامیاب ہوسکے۔ تاہم فلم ریلیز کے بعد جھانوی کپور کی اداکاری مداحوں کو بھاگئی۔

اس خبرکوبھی پڑھیں: جھانوی کپورکا تعلیمی میدان میں پیچھے

جھانوی کپور فلم میں نہ صرف بہترین اداکاری کرتی نظرآئیں بلکہ بہت خوبصورت بھی لگ رہی ہیں جب کہ ایشان کھتر کی اداکاری کو بھی لوگوں کی جانب سے بےحد سراہا جارہا ہے۔

The post جھانوی کپور کی فلم’’دھڑک‘‘مداحوں کو بھاگئی appeared first on ایکسپریس اردو.

اداکار بھی انسان ہوتے ہیں، کاجول کا صحافیوں سے شکوہ

ممبئی: نامور بالی ووڈ اداکارہ کاجول نےشکوہ کرتے ہوئے کہا ہے کہ ہم اداکار بھی انسان ہوتے ہیں اسلیے ہمیں بھی عام لوگوں کی طرح ٹریٹ کیاجائے۔

اداکارہ کاجول کا شمار بالی ووڈ کی ان اداکاراؤں میں ہوتا ہے جن کا سحرکبھی ختم نہیں ہوتا۔ کاجول کے جتنے پرستار ماضی میں تھے اس سے کہیں زیادہ آج ہیں۔ جب کہ صحافی اور فوٹوگرافرز ان کی ایک تصویر لینے کے لیے گھنٹوں کھڑے رہتے ہیں تاہم کاجول کو صحافیوں اورفوٹوگرافرزکا یہ رویہ پسند نہیں اور انہوں نے شکوہ کرتے ہوئے کہا ہے کہ اداکار بھی انسان ہوتے ہیں۔

بی بی سی ایشین کو انٹرویو دیتے ہوئے کاجول نے پاپارازی(فیشن فوٹوگرافرز)کو خوب کھری کھری سنائیں اور کہا آپ چاہے کہیں بھی جائیں، عام لوگوں کی طرح کافی پینے جائیں یا جم جائیں، پاپارازی وہاں موجود ہوتے ہیں اورہر وقت اداکاروں کی تصاویر لینے کی کوشش کرتے ہیں۔

اس خبرکوبھی پڑھیں: کاجول کی ٹُھکرائی ہوئی سپرہٹ فلمیں

کاجول نے کہا اگراتفاق سے آپ نے اس وقت اچھے کپڑے نہ پہنے ہوں یا تیار نہ ہوئے ہوں تو آپ کو شدید تنقید کا نشانہ بنایا جاتا ہےاور  جج کیا جاتا ہے۔ لوگ کہتے ہیں آپ کو بالکل فیشن سینس نہیں ہے یا آپ کوکپڑے پہننے کی بھی تمیز نہیں ہے۔ کاجول نے پاپارازیوں کے اس رویے کو نہایت خراب قراردیا۔

کاجول نے فوٹوگرافرز اورصحافیوں پر بھڑکتے ہوئے کہا کیا ہم نارمل اور عام انسان نہیں ہیں یا کیا ہم انسان ہی نہیں ہیں۔ اداکارہ نے کہا وہ دوسروں کی جانب سے کیے جانےوالے تبصروں سے متاثر ہوتی ہیں وہ بچپن سے ایسی ہیں۔ کاجول نے سوال کرتے ہوئے کیا ایک عام انسان ہر وقت تیار ہوکر رہتا ہے؟

اس خبرکوبھی پڑھیں: کاجول گرگئیں، ویڈیووائرل

کاجول نےاپنی بیٹی نائسا کے بارے میں بات کرتے ہوئے کہا کہ جب وہ ممبئی میں تھی اسے بھی یہ سب برداشت کرنا پڑتاتھاچاہے ہم ایئرپورٹ پر ہوں یا کہیں بھی ہر وقت ہر کوئی تصاویر لینے کی کوشش کرتا تھا اور یہ چیزیں اسے بھی متاثر کرتی تھیں۔

The post اداکار بھی انسان ہوتے ہیں، کاجول کا صحافیوں سے شکوہ appeared first on ایکسپریس اردو.